سموگ مشن، پنجاب حکومت دا ہر بدھ نوں لہور بند رکھن دا فیصلہ

لہور( پنجابی میڈیا گروپ)پنجاب حکومت نے سموگ اُتے قابو پان لئی 2مہینیاں تک ہر بدھ والے دن لہور نوں بند رکھن دا فیصلہ کیتا اے۔کمشنر لہور محمد علی رندھاوا دی زیر صدارت سموگ بارے اجلاس ہویا جس وچ سی سی پی او لہور تے شہر دیاں وڈھیاں مارکیٹاں دے تاجراں رَلت کیتی، اجلاس وچ قائم مقام ڈی سی لہور عدنان رشید ،ایڈیشنل ڈپٹی کمشنر جنرل ذیشان رانجھا،اسسٹنٹ کمشنرز وی رَلتی ہوئے۔سموگ توں بچن لئی تاجراں نے کمشنر لہور ڈویژن تے سی سی پی او دی تجویز مَن لئی۔ایس موقع اُتے گل بات کر دیاں ہویاں کمشنر لہور محمد علی رندھاوا دا کہنا سی کہ وزیراعلی محسن نقوی دے حکم اُتے 2مہینیاں تک ہر بدھ والے دن لہور بند رہے گا، بدھ نوں سکول، مارکیٹاں، سرکاری و نجی ادارے بند رہن گے تے ورک فرام ہوم ہوئے گا، سموگ دے لحاظ نال اکتوبر تے نومبر بوہت اہم مہینے نیں۔