24گھنٹیاں وچ غزہ خالی کرن دی اسرائیلی دھمکی

غزہ( پنجابی میڈیا گروپ)اسرائیل نے شمالی غزہ دی11 لکھ دی آبادی نوں 24 گھنٹیاں وچ علاقہ چھڈن دی دھمکی دے دتی ۔اسرائیل نے اقوام متحدہ دے حکام نال رابطیاں وچ الٹی میٹم دیندیاں ہویاں آکھیا کہ شمالی غزہ دے11 لکھ رہائشی 24 گھنٹیاں وچ علاقہ خالی کردیون۔دُوجے پاسے اسرائیل نے غزہ دی شہری آبادی اُتے6 ہزار بم سُٹن دا اعتراف کرلیا۔اسرائیلی فضائیہ ولوں جاری بیان مطابق غزہ وچ 6 دناں دے دوران حماس دے ٹھکانیاں اُتے4 ہزار ٹن وزنی 6ہزار بم مارے گئے نیں۔ فضائی حملیاں وچ 3600 توں وَدھ اہداف نوں نشانہ بنایا گیا۔حماس دے ترجمان ابو عبیدہ نے بیان وچ آکھیا اے کہ زمینی حملہ کیتا گیا تے اسرائیل دی فوج نوں صفحہ ہستی توں مٹا دتا جائے گا۔ جنگ دے شروع اُتے ہی اسرائیلی فوج دا غزہ ڈویژن تباہ کردتا گیا سی۔ القدس دے تحفظ لئی ایسیاں ہور کارروائیاں کرن دا فیصلہ کیتا گیا اے۔ آپریشن الاقصی فلڈ وچ توقع توں وَدھ کامیابی ملی اے۔