الیکشن کمیشن دی 1کروڑ30لکھ افراد دے حق رائے دہی توں محروم ہون دی تردید

اسلام آباد( پنجابی میڈیا گروپ)الیکشن کمیشن آف پاکستان نے 1کروڑ30لکھ ووٹراں دے حق رائے دہی توں محروم ہون دیاں خبراں دی تردید کیتی اے۔الیکشن کمیشن ولوں جاری بیان وچ آکھیا گیا اے کہ الیکشن ایکٹ2017دی دفعہ27دے مطابق کسی وی ووٹردا اندراج اوس دے شناختی کارڈ مطابق مستقل یا موجودہ پتے اُتے کیتاجاندا اے جس دا آبادی دے اعداد و شمار نال کوئی تعلق نہیں اے۔ مردم شماری کسی وی شخص دی ذاتی موجودگی اُتے کیتی جاندی اے جدکہ ووٹراںدا اندراج شناختی کارڈ دے پتے مطابق ہُندا اے ۔الیکشن کمیشن نے آکھیا کہ مقامی اخبار وچ شائع ہون والی ایس رپورٹ وچ کوئی صداقت نہیں کہ 1کروڑ30لکھ افراد اپنا حق رائے دہی استعمال نہیں کرسکن گے۔ سارے اہل افراد دے ووٹ دے اندراج نوں یقینی بنان لئی انتخابی فہرستاں نوں28 ستمبر2023 توں غیر منجمد کیتاہویا اے تے عوام نوں میڈیاذریعے ووٹ دے اندراج، اخراج تے درستگی بارے وچ مسلسل آگاہی فراہم کیتی جارہی اے۔ ایہ عمل 25 اکتوبر 2023تک جاری رہے گا۔