نوازشریف دی واپسی ڈیل تحت ہوئی، سپیکر قومی اسمبلی دا دعوی

اسلام آباد(پنجابی میڈیا گروپ)سابق وزیراعظم تے سپیکر قومی اسمبلی راجہ پرویز اشرف نے دعوی کیتا اے کہ قائد مسلم لیگ (ن)نواز شریف دی واپسی سمجھوتے تحت ممکن ہوئی۔صحافیاں نال غیر رسمی گل بات وچ سپیکر قومی اسمبلی راجہ پرویز اشرف توں سوال پچھیا گیا کہ کیا نواز شریف کسی ڈیل تحت واپس آ رہے نیں؟ جس اُتے راجہ پرویز اشرف نے آکھیا کہ ظاہر اے کوئی اعتماد سازی ہوئی ہوئے گی تَدای تاں واپس آ رہے نیں، ہُن نواز شریف دی صحت وی ٹھیک رہنی چاہیدی اے۔صحافی نے سوال کیتا کہ کیا الیکشن ہو رہے نیں؟جس اُتے اونہاں دا کہنا سی کہ ایہ تُسی دسو کہ الیکشن ہو رہے نیں؟ پیپلزپارٹی دا مزاج بوہت ٹھنڈا تے بہتر رہیا اے، اگر پیپلز پارٹی لیول پلیئنگ فیلڈ دی گل کر رہی اے تے سمجھو واقعی کجھ تاں ہے۔راجہ پرویز اشرف نے آکھیا کہ وفاق تے پنجاب دی کابینہ وچ ن لیگ دے لوگ شامل نیں، ن لیگ دے اج وی سارے کم ہو رہے نیں، ساڈھے خلاف نیب دے جھوٹے مقدمے بنائے گئے نیں، میرے خلاف نیب دے کیساں وچ نیب دے کول کوئی ثبوت نہیں، مقدمیاں دا سامنا کرن لئی تیار ہاں۔