او آئی سی ملک فلسطینیاں نوں فوری خوراک تے دوایاں فراہم کرن، شہباز شریف

لہور( پنجابی میڈیا گروپ)مسلم لیگ ن دے صدر تے سابق وزیر اعظم شہباز شریف نے او آئی سی ملکاں توں اپیل کیتی اے کہ اوہ فلسطینیاں نوں فوری طوراُتے خوراک تے دوایاں فراہم کرن۔سماجی رابطے دی ویب سائٹ ٹوئٹر اُتے اپنے پیغام وچ سابق وزیراعظم شہباز شریف نے آکھیا کہ اسیں فلسطینیاں خلاف اسرائیلی بربریت دی شدید مذمت کردے ہاں، شہریاں، بالاں تے ہسپتالاں اُتے بمباری فوری بند ہونی چاہیدی اے۔اونہاں دا کہنا سی کہ دُنیا نوں اقوام متحدہ دیاں قراردادااں اُتے عملدرآمد تے ایس جاری نسل کشی نوں روکن لئی اقدام کرنا چاہیدا اے، اسیں سارے اک آزاد فلسطینی ریاست دی حمایت کردے ہاں، جس دا دارالحکومت القدس ہوئے ۔ اسرائیل دے غزہ اُتے وحشیانہ حملیاں وچ شہید فلسطینیاں دی تعداد 3 ہزار ہوگئی اے خیال رہے کہ اسرائیل دے غزہ اُتے وحشیانہ حملے جاری نیں جنہاں دے نتیجے وچ شہید ہون والے فلسطینیاں دی تعداد3ہزار تک اپڑگئی اے جدکہ بالاں تے عورتاں سنے9 ہزار افراد زخمی نیں۔