ایئر انڈیا ایکسپریس دی دبئی توں امرتسر پرواز دی کراچی وچ میڈیکل لینڈنگ

کراچی(پنجابی میڈیا گروپ)ایئر انڈیا ایکسپریس دی دبئی توں امرتسر جان والی پرواز دی کراچی وچ میڈیکل لینڈنگ ہوئی، بھارت دا بوئنگ 737 طیارہ 2 گھنٹے تک کراچی ایئرپورٹ اُتے موجود رہیا۔ سول ایوی ایشن حکام مطابق بھارت دی ھگ گھٹ لاگت دی ایئر لائن ایئر انڈیا ایکسپریس دی پرواز آئی ایکس 192دبئی توں امرتسر دے روٹ اُتے سی، پاکستان دی فضائی حدود وچ سفر دوران اک مسافردی طبیعت خراب ہوئی۔پائلٹ دے رابطہ کرن اُتے ایئر ٹریفک کنٹرولر نے انسانی ہمدردی دی بنیاداُتے طیارے نوں کراچی ایئرپورٹ اُتے لینڈنگ دی اجازت دے دتی جیتھے سی اے اے دی میڈیکل ٹیم نے مسافردا معائنہ تے علاج کیتا۔بھارت دے شہری 50 سالہ مسافر دی طبیعت ٹھیک نہیں سی جس نوں میڈیکل ٹیم نے طبی امداد دتی، مسافر نوں ٹریولنگ لئی فٹ قرار دتے جان اُتے طیارہ کراچی توں امرتسر لئی ٹیک آف کرگیا۔