فواد چودھری خلاف ملازماں نوں اُکسان دے کیس دی سماعت ملتوی

اسلام آباد( پنجابی میڈیا گروپ)سابق وفاقی وزیر فواد چودھری خلاف سرکاری ملازماں نوں اُکسان دے کیس دی سماعت اک وارفیر ملتوی کر دتی گئی۔ڈسٹرکٹ اینڈ سیشن کورٹس اسلام آباد دے جج طاہرعباس سپرا دی عدالت وچ کیس دی سماعت ہوئی جیتھے فواد چودھری اپنے وکیل فیصل چودھری دے نال پیش ہوئے۔دوران سماعت جج طاہر عباس سپرا نے فواد چودھری نال مکالمہ کردیاں ہوہاں آکھیا کہ کیہ حال نیں چودھری صاحب؟ جس اُتے سابق وفاقی وزیر نے جواب دتا کہ بس نزلہ زکام کھانسی اے، جج نے آکھیا اپنا خیال رکھیا کرو چودھری صاحب، تُسی وڈھے لوکاں نوںعزیز او، تہانوں ساریاں نوں ہی عزیز نیں جس اُتے فواد چودھری نے جواب دتا کہ بس سر کوشش اے اپنا خیال رکھن دی۔فواد چودھری نے عدالت نوں دسیا کہ سپریم کورٹ وچ فیصلہ آگیا اے، کیس ختم ہو گیا اے، 13 نومبر نوں الیکشن کمیشن وچ سماعت مقرر اے، کیس دی سماعت 14 نومبر تک ملتوی کر دتی۔بعد وچ ڈسٹرکٹ اینڈ سیشن کورٹس اسلام آباد نے فواد چودھری دی استدعا منظور کردیاں ہویاں کیس دی ہور سماعت 14 نومبر تک لئی ملتوی کردتی۔