پی ٹی آئی نے ریاست مخالف پروپیگنڈے لئی سرکاری پیسہ استعمال کیتا،عطا تارڑ

لہور( پنجابی میڈیا گروپ)مسلم لیگ ن دے رہنما عطا تارڑ نے آکھیا اے کہ پاکستان تحریک انصاف نے ریاست مخالف پروپیگنڈے لئی سرکاری پیسے دا استعمال کیتا۔میڈیا نال گل بات وچ ن لیگی رہنما عطا تارڑ نے آکھیاکہ خیبرپختونخوا وچ تحریک انصاف دی حکومت نے سوشل میڈیا ٹرولرز بھرتی کیتے، ساڈھے کول تفصیل اے کہ کس سفاکانہ طریقے نال عوامی پیسے نوں لُٹیا گیا، 2019 وچ خیبرپختونخوا حکومت نے سوشل میڈیا انفلوئنسرز دے طور اُتے1100لوگ بھرتی کیتے، اونہاں نوں بھرتی کرن دا مقصد صحافیاں، سیاستداناں نوں گالیاں دینا سن۔اونہاں نے آکھیا کہ ایس منصوبے اُتے کل87کروڑ روپے خرچ ہونا سن، معاملے اُتے سخت توں سخت کارروائی ہونی چاہیدی اے، کیا ایہ نوکریاں تحریک انصاف دی ملکیت سن؟ پارٹی دی تشہیر لئی پارٹی فنڈز توں پیسے جاری ہونا چاہیدے سن، غریب عوام دا87کروڑ روپیہ خرچ کیتا گیا، غریب توں دوائی، روٹی تے تعلیم دا حق کھوئیا گیا۔عطا تارڑ دا ہور کہنا سی کہ سرکاری خزانے توں معاوضہ دے کے اداریاں خلاف بیان بازی کیتی گئی، جنہاں مجرماں نے اینہاں 1100 لوکاں نوں بھرتی کیتااونہاں دے خلاف کارروائی ہونی چاہیدی اے، ایسے لوکاں نوں کیفرکردار تک پہنچانا قومی فریضہ اے، ایس گھنائونے عمل اُتے کل اک ارب توں وَدھ پیسہ خرچ کیتا گیا۔