حماس اَتگرد تنظیم نہیں: رجب طیب اردوان

ترکیہ(پنجابی میڈیا گروپ) رجب طیب اردوان نے آکھیا اے کہ حماس اَتگرد تنظیم نہیں بلکہ اک حریت پسند گروپ اے جیہڑا اپنی سر زمین دے تحفظ لئی جنگ لڑ رہیا اے۔پارلیمنٹ وچ اپنی پارٹی دے منتخب اراکاناں نال خطاب وچ اردوان نے آکھیا کہ اسرائیل نے ترکیہ دے چنگے ارادیاں دا ناجائز فائدہ چُکیا اے تے ایسی وجہ نال اوہ ہُن اسرائیل دا دورہ نہیں کرن گے۔اونہاں نے اسرائیل تے حماس دے وچکار فوری جنگ بندی دا مطالبہ کیتا تے عالمی طاقتاں اُتے زور دتا کہ اوہ غزہ اُتے بمباری روکن لئی اسرائیل اُتے دبا پان۔اپنی تقریر وچ اردوان نے ہور آکھیا کہ رفاہ سرحدی گیٹ نوں انسانی امداد لئی کھلا رکھیا جانا چاہیدا اے تے دوناں فریقاں دے وچکار قیدیاں دے تبادلے نوں فوری طور اُتے مکمل کیتا جانا چا ہیدا اے۔اونہاں نے اسرائیل تے حماس دے وچکار جنگ روکن وچ اقوام متحدہ دی نااہلیت اُتے وی مایوسی دا اظہار کیتا۔اونہاں نے بین الاقوامی اسرائیل فلسطین امن کانفرنس دے انعقاد دی تجویز دتی تے آکھیاکہ فلسطینی عوام نوں دو ریاستی حل لئی متحد ہونا چاہیدا اے،عرب ریاستاں نوں اوس لئی اخلاقی تے مالی مدد فراہم کرنی چا ہیدی اے۔رجب طیب اردوان دا کہنا سی کہ غیر علاقائی ملکاں نوں اسرائیل دی حمایت وچ اگ وچ تیل پانا بند کرنا چا ہیدا اے، دیرپا امن تے جنگ بندی لئی مسلم ملکاں نوں مل کے اقدام کرنے چاہیدے نیں، ترکیہ فلسطینی فریق لئی ضامن بنن اُتے تیار اے۔