ملتان: اک دن وچ 125 بجلی چور گرفتار، ٹوٹل تعداد8 ہزار 370 ہوگئی

ملتان( پنجابی میڈیا گروپ)میپکو ریجن وچ بجلی چوراں تے نادہندگان خلاف جاری آپریشن وچ اک دن دے دوران مختلف کیٹگریاں دے 125 بجلی چور پھڑے گئے نیں۔میپکو ریجن وچ 7 ستمبر توں ہُن تک پھڑے گئے بجلی چوراں دی مجموعی تعداد 8 ہزار 370 ہو گئی، اک دن وچ 108 نویں مقدمے درج کیتے گئے جس نال مقدمیاں دی کل تعداد 8 ہزار 108 ہو گئی اے۔بجلی چوراں اُتے مجموعی طور اُتے 55 کروڑ 91 لکھ روپے جرمانے عائد کیتے گئے نیں جس وچوںہُن تک 24 کروڑ 63 لکھ روپے جرمانہ وصول کر لئیا گیا اے۔لودھراں وچ میپکو تے پلس دے سانجھے آپریشن وچ افغان شنواری ہوٹل وچ بجلی چوری پھڑی گئی، ہوٹل دے تھری فیز میٹر وچ لوپ لا کے میٹر سلو کیتا ہویا سی تے پورے ہوٹل نوں وڈھے پیمانے اُتے بجلی دی سپلائی جاری دی، ہوٹل منیجر نوں موقع توں گرفتار کر لئیا گیا۔