استحکام پاکستان پارٹی نوں”عقاب”انتخابی نشان الاٹ

لہور( پنجابی میڈیا گروپ)الیکشن کمیشن نے استحکام پاکستان پارٹی نوں”عقاب”دا انتخابی نشان الاٹ کر دتا۔استحکام پاکستان پارٹی نے الیکشن کمیشن نوں عقاب دا نشان الاٹ کرن دی درخواست دتی سی جس اُتے ای سی پی نے فیصلہ محفوظ کر رکھیا سی ۔الیکشن کمیشن نے محفوظ فیصلہ سناندیاں ہویاں استحکام پاکستان دی درخواست منظور کر لئی تے آئی پی پی نوں”عقاب” دا انتخابی نشان الاٹ کر دتا۔انتخابی نشان الاٹ ہون دے بعد آئی پی پی دی الیکشن کمیشن وچ رجسٹریشن دا عمل مکمل ہوگیا، استحکام پاکستان پارٹی ہُن باضابطہ طور اُتے پاکستان وچ ہون والے ہر طرح دے الیکشن وچ حصہ لے سکے گی۔الیکشن کمیشن نے 3 صفحیاں اُتے مشتمل تحریری فیصلہ جاری کیتا اے، فیصلے وچ آکھیا گیا اے کہ استحکام پاکستان پارٹی نے 3 انتخابی نشان بلا، چڑیا تے عقاب لین دا مطالبہ کیتا سی۔فیصلے دے متن وچ آکھیاگیا کہ بلے دے نشان دا معاملہ عدالت وچ اے تے چڑیا دا نشان اک تے سیاسی جماعت دے کول اے ایس لئی الیکشن کمیشن نے استحکام پاکستان پارٹی نوں عقاب انتخابی نشان الاٹ کیتا اے۔