چیئرمین پی ٹی آئی دی فیملی نال ملاقات دی درخواست نمٹا دتی گئی

اسلام آباد(پنجابی میڈیا گروپ)اسلام آباد ہائیکورٹ نے چیئرمین پی ٹی آئی دی وکیلاں تے فیملی نال ملاقات دی درخواست نمٹا دتی۔ جسٹس میاں گل حسن اورنگزیب تے جسٹس ارباب محمد طاہر نے کیس دی سماعت کیتی، وکیل شیر افضل مروت نے آکھیا کہ سپرنٹنڈنٹ جیل نے چیئرمین پی ٹی آئی نال ملاقات دا نوا شیڈول بنایا اے، سپرنٹنڈنٹ جیل نے نویں شیڈول وچ تھوڑا ریلیف دین دی کوشش کیتی اے۔وکیل شیرافضل مروت نے آکھیا چیئرمین پی ٹی آئی دی مرضی نال ملاقات لئی کجھ لوکاں دے نام شامل تے کَڈے گئے نیں، 10وکیلاں نوں چیئرمین پی ٹی آئی نال ملاقات دی اجازت دتی گئی اے،اسیں ہفتے وچ 6 دن ملاقات دا آکھیا سی لیکن2دن وکیلاں تے 1دن فیملی نوں دتا گیا اے۔اونہاں نے آکھیا کہ ساڈھی استدعا اے کہ چیئرمین پی ٹی آئی دی گھروالی نال ملاقات وی2دن کر دتی جائے، چیئرمین پی ٹی آئی نے میرے نال ملاقات وچ اک شکوہ کیتا اے کہ گھر والی نال ملاقات وچ کوئی پرائیویسی نہیں دتی جاندی، جسٹس حسن اورنگزیب نے آکھیا کہ ایہ طریقے پرانے دور دے نیں، بے نظیر بھٹو تے ہوراںنال ایسا کیتا جاندا سی۔ایڈیشنل اٹارنی جنرل منور اقبال دوگل نے آکھیا ملاقات دا فیر غلط استعمال نہیں کیتا جانا چاہیدا، شوہر تے بیوی دا؟جسٹس میاں گل حسن اورنگزیب دا ایڈیشنل اٹارنی جنرل توں استفسار، ایڈیشنل اٹارنی جنرل نے آکھیا میں وکیلاں دی ملاقات بارے کہہ رہیا ہاں۔جسٹس میاں گل حسن اورنگزیب نے آکھیا تُسی فیر کہہ رہے او کہ وکالت ناماں اُتے دستخط نہ کروا لین؟ ایڈیشنل اٹارنی جنرل نے آکھیاجیل وچ ملاقات نوں باہر آ کے سیاسی طور اُتے استعمال نہ کیتا جائے، جسٹس حسن اورنگزیب نے آکھیا ملاقات بامقصد تے بامعنی ہونی چاہیدی اے جس وچ لیگل ایڈوائس دتی جائے۔