ن لیگ دا پوری قوت نال انتخابی مہم چلان دا فیصلہ

اسلام آباد( پنجابی میڈیا گروپ)پاکستان مسلم لیگ ن نے پوری قوت دے نال انتخابی مہم چلان دا فیصلہ کیتا اے، پارٹی قائد نواز شریف نے پارٹی نوں بھرپور تیاریاں تے 9 نکاتی ایجنڈے تحت انتخابی منشور تیار کرن دی ہدایت کردتی۔میڈیا دے مطابق نواز شریف نے پارٹی نوں ملک بھر وچ بھرپور طریقے نال تے سارے وسائل استعمال کردیاں ہویاں انتخابی مہم چلان دی ہدایت کیتی اے جس دے تحت ملک بھر وچ جلسے، ورکرز کنونشن تے ہور تقریباں منعقد ہون گیاں جَد کہ انتخابی سرگرمیاں دے شیڈول دی تیاری وی شروع کردتی گئی۔ذرائع مطابق نواز شریف نے پارٹی دا انتخابی منشور تیار کرن لئی کمیٹی نوں ٹاسک دے دتا ایہ انتخابی منشور نواز شریف دے 9 نکاتی منشور دی روشنی وچ تیارکیتا جائے گا، نواز شریف نے 21 اکتوبر نوں4ورھیاں بعد وطن واپسی اُتے مینار پاکستان اُتے جلسہ عام نال خطاب وچ ملک نوں بحراناں تے عوام نوں مہنگائی، بے روزگاری تے غربت توں نجات دلان لئی9 نکاتی ایجنڈے تحت انتخابی منشور تیار کرن دی ہدایت کردتی۔