بجلی کمپنیاں دے افسران دے مفت یونٹ بندکرن دا فیصلہ

لہور(پنجابی میڈیا گروپ)نگران وفاقی حکومت نے بجلی کمپنیاں دے افسراں دے بجلی دے مفت یونٹ بند کرن دا فیصلہ کیتا اے تے اوس دی بجائے اضافی رقم دین دی سفارش کیتی گئی اے۔وفاقی حکومت نے 3 اہم فیصلیاں دی تیاری کرلئی اے تے اونہاں دی اج منظوری دا امکان اے۔ ذرائع مطابق تاپی گیس پائپ لائن منصوبے نوں ریاستی استثنی تے اوگرا توں چھوٹ دین دا فیصلہ کیتا گیا اے، سردیاں وچ صنعتاںنوں رعایتی ریٹ اُتے بجلی دین دا فیصلہ کیتا گیا اے، اوس دے علاوہ بجلی کمپنیاں دے افسراںلئی مفت بجلی دی سہولت ختم کرن دا فیصلہ کیتا اے۔ذرائع دا کہنا اے کہ گریڈ 17 توں گریڈ 21 دے افسراں نوں ماہانہ مفت یونٹ دی فراہمی بند کرن دی سفارش کیتی گئی اے، ایس نال سالانہ 6 ارب روپے توں وَدھ بچت داامکان اے۔ذرائع مطابق گریڈ 17 دے افسر نوں 450 ماہانہ مفت یونٹ دی بجائے 15ہزار 858 روپے دین دی سفارش کیتی گئی اے،گریڈ 18 دے افسر نوں ماہانہ 600 مفت یونٹ دی بجائے 21 ہزار 996 روپے دین دی سفارش کیتی گئی اے، گریڈ 19 دے افسر نوں ماہانہ 880 مفت یونٹ دی بجائے37ہزار 594 روپے دین دی سفارش کیتی گئی اے۔