غزہ لہو لہو : فلسطینی شہیداں دی تعداد8ہزار توں وَدھ گئی

غزہ(پنجابی میڈیا گروپ)اسرائیل نے اقوام متحدہ دی قرارداد نوں ہوا وچ اُڑادتا، صیہونی فوج دے غزہ اُتے بری، بحری تے فضائی حملے جاری نیں تے ٹینکاں تے بھاری توپ خانے نال نہتے فلسطینی شہریاں نوں خون وچ نہلادتا گیا اے ۔اسرائیل ہٹ دھرمی توں باز نہ آیا، غزہ وچ جنگ بندی دی عالمی سفارتی دبا نوں نظرانداز کر دیاں ہویاں صیہونی فورسز ولوں نہتے شہریاں اُتے شدیدبمباری کیتی گئی ، اسرائیلی زمینی، فضائی تے بحریہ دی بمباری نال ہور300 توں وَدھ فلسطینی شہید ہوگئے۔غزہ اُتے وحشیانہ بمباری نال وڈھی تباہی پھیل گئی اے تے درجناں لاشاں دے ملبے تھلے دبے جان دا اندیشہ اے ، ایس حوالے نال فلسطینی وزارت صحت دا کہنا اے کہ حملیاں وچ شہیداں دی تعداد8ہزارہو گئی اے جنہاں وچ3600توں وَدھ بال تے1800 توں وَدھ شامل نیں ۔اسرائیلی فوج دے حملیاں وچ22ہزار توں وَدھ فلسطینی زخمی ہوئے نیں جدکہ940بالاں سنے 1650فلسطینی لاپتہ نیں ۔غزہ اُتے اسرائیل دی حالیہ شدید ترین بمباری دے نتیجے وچ انٹرنیٹ ومواصلاتی نظام تباہ ہو گیا تے اوتھے پھَسے ہوئے23 لکھ لوکاں داباقی دنیا دے نال رابطہ بالکل منقطع ہو گیا اے۔جمعے نوں اقوام متحدہ دی جنرل اسمبلی نے اسرائیل تے حماس دے وچکار انسانی بنیاداں اُتے جنگ بندی اُتے فوری عمل درآمد لئی اردن ولوں پیش کیتی گئی قرارداد نوں متفقہ طور اُتے قبول کیتا گیا سی۔اسرائیلی فوج حماس ولوں اسرائیل اُتے شروع کیتے گئے اک غیرمعمولی حملے دے جواب وچ7اکتوبر توں تباہ کن بمباری دیاںکارروائیاں جاری رکھے ہوئے اے۔