وزیراعظم دا ترکی دے نال تعلقات ہور مضبوط کرن دا عزم

اسلام آباد( پنجابی میڈیا گروپ)نگران وزیراعظم انوار الحق کاکڑ نے ترکی نال اقتصادی شعبے وچ کثیرجہتی تذویراتی تعلقات ہور مضبوط بنان دے پاکستانی عزم داعہد کیتا اے۔ترکی دے100ویں یوم جمہوریہ دے موقع اُتے ترک عوام دے نام اک پیغام وچ اونہاں نے آکھیا کہ حکومت نے ترکی دے نال شیواں دی تجارت دے معاہدے تے تذویراتی اقتصادی فریم ورک اُتے دستخط سنے اقتصادی تعلقات ہور مضبوط بنان لئی ٹھوس اقدام کیتے نیں۔نگران وزیراعظم نے آکھیا کہ گہری اقتصادی شراکت داری تے مضبوط رابطے آن والے وَرھیاں وچ دوطرفہ تعلقات اگے ودھان وچ اہم کردار ادا کرن گے۔انوار الحق کاکڑ نے پاکستان تے ترکی دے وچکار مذہب، ثقافت تے تریخ اُتے مبنی برادرانہ تعلقات نوں اُجاگر کیتا۔اونہاں نے آکھیا کہ اعلی سطحی تذویراتی تعاون تے تذویراتی اقتصادی فریم ورک سنے ادارہ جاتی طریقہ کار دے تحت دفاع، صحت، تعلیم، زراعت، سیاحت، ثقافت تے اقتصادی شعبیاں وچ پاکستان تے ترکی دے وچکار تعلقات دے ودھااُتے توجہ مرکوز کیتی جا رہی اے۔