عالمی برادری اسرائیل اُتے جنگ بندی لئی دَبا پائے:نگران وزیرخارجہ

اسلام آباد( پنجابی میڈیا گروپ) نگران وزیرِ خارجہ جلیل عباس جیلانی نے عالمی برادری توں مطالبہ کیتا اے کہ اوہ غزہ وچ فوری جنگ بندی دا مطالبہ کرن والی اقوام متحدہ دیاں قرارداداں دااحترام کرن لئی اسرائیل اُتے دبا پائے۔سوشل میڈیا پلیٹ فارم اُتے اک ٹویٹ وچ نگران وزیر خارجہ جلیل عباس جیلانی نے آکھیا کہ اسرائیل نے غزہ اُتے بمباری جاری رکھدیاں ہویاں بجلی تے سارے مواصلاتی رابطے کَٹ دتے نیں۔اونہاں نے آکھیا کہ ایس اندھیرے وچ ساہنوں معصوم فلسطینیاں دی حالت نوں نظر انداز نہیں کرنا چا ہیدا۔واضح رہے کہ اسرائیل دے غزہ اُتے فضائی تے زمینی حملیاں وچ شہید فلسطینیاں دی تعداد8ہزار تک پہنچ گئی اے تے اونہاں نوںشہید ہون والیاں وچ ادھی تعداد بالاں دی اے۔ اسرائیلی فوج دے حملیاں وچ22ہزار توں وَدھ فلسطینی زخمی ہوئے نیں جدکہ940بالاں سنے1650فلسطینی لاپتہ نیں ۔جمعے نوں اقوام متحدہ دی جنرل اسمبلی نے اسرائیل تے حماس دے وچکار انسانی بنیاداں اُتے جنگ بندی فوری عمل درآمد لئی اردن ولوں پیش کیتی گئی قرارداد نوں متفقہ طوراُتے قبول کیتا گیا سی۔