10ورا فلسطین دا دورہ کیتا،اپنیاں آکھاں نال ظلم ہُندا ویکھیا،چودھری سرور

لہور(پنجابی میڈیا گروپ)پاکستان مسلم لیگ(ق) دے رہنما چودھری محمد سرور نے آکھیا اے کہ میں نے اپنی زندگی وچ10 وار فلسطین دا دورہ کیتا تے اوتھے اپنیاں اکھاں نال ظلم ہُنداویکھیا۔لہور وچ فلسطین ریلی دے رَلتیاں نال خطاب وچ رہنما مسلم لیگ ق چودھری محمد سرور نے آکھیا کہ اسرائیل نے فلسطین اُتے ناجائز قبضہ کر رکھیا اے، 1948 توں لے کے اج تک اسرائیل فلسطین دے علاقیاں اُتے قبضہ اے، فلسطینی صرف اپنا 22 فیصد علاقہ منگدے نیں۔اونہاں نے آکھیاکہ بدقسمتی نال ہیومن رائٹس نوں اسرائیل کسی خاطر وچ نہیں لیاندا، جیہڑا ظلم اسرائیل کر رہیا اے اوہ کوئی ہور ملک کرداتے معاملہ کجھ ہور ہُندا، میں خموش رہن اُتے انٹرنیشنل کمیونٹی دی مذمت کردا ہاں، لوگ اوُتھے بُھکے مر رہے نیں۔چودھری محمد سرور نے ہور آکھیاکہ اسرائیل فلسطین وچ انسانی حقوق دیاں خلاف ورزیاں کر رہیا اے، ہسپتالاں وچ علاج معالجے دیاں سہولتاں نہیں، غزہ دے لوگ اک جیل وچ رہ رہے نیں، چودھری سرور ایہہ پوری دنیا دے مسلماناں دی ذمہ داری بن دی اے کہ فلسطینیاں لئی آوازاُچی کرن۔