غیرقنونی غیرملکیاں دی بے دخلی عالمی اصولاں مطابق اے،پاکستان

اسلام آباد(پنجابی میڈیا گروپ)ترجمان وزارت خارجہ ممتاز زہرا بلوچ نے آکھیا اے کہ غیرقنونی غیرملکیاں دی بے دخلی دے مثبت اثرات ہون گے۔ممتاز زہرا بلوچ نے اقوام متحدہ دے ادارے برائے مہاجرین دے بیان اتے تبصرہ کردیاں ہویاں آکھیا کہ غیرقنونی طور اتے وسن والیاں دے انخلا دے منصوبہ دا اطلاق پاکستان وچ غیر قنونی طور اتے وسن والیاں غیر ملکیاں اتے ہندا اے، ایس منصوبے دے اطلاق وچ کسی وی ملک یا شہریت نوں ملحوظ خاطر نہیں رکھیا جارہیا ۔ ترجمان وزارت خارجہ نے آکھیا کہ ایہ فیصلہ پاکستان دے خودمختار قنون تے بین الاقوامی اصولاں نون سامنے رکھ کے کیتا گیا اے ، پاکستان وچ وسن والے سارے رجسٹرڈ غیر ملکی ایس دے دائرہ کار وچ نہیں آندے۔اونہاں دا کہنا سی کہ حکومت پاکستان ایس خراب صورتحال دے شکار افراد دی سیکیورٹی تے تحفظ دا عزم کیتے ہوئے اے ، 40ورھیاں توں لکھاں افغان بہن بھائیاں دی میزبانی اوس دا جیوندا جاگدا ثبوت اے۔اونہاں نے ہور آکھیا کہ بین الاقوامی برادری ترجیحی بنیاداں اتے مہاجرین دی صورتحال نوں تحفظ فراہم کرن تے حل کرن تے پائیدار حل لئی سانجھیاں کوششاں کرے، پاکستان ایس حوالے نال اپنے بین الاقوامی شراکت داراں دے نال کم کردا رہے گا۔