پنجاب حکومت تے الیکشن کمیشن شفاف الیکشن داانعقاد یقینی بنان لئی پرعزم

لہور(پنجابی میڈیا گروپ)پنجاب حکومت تے الیکشن کمیشن نے عام الیکشن نوں پرامن تے شفاف بنان دے عزم دا عہد کیتا اے۔ایوان وزیراعلی وچ محسن نقوی تے چیف الیکشن کمشنر سکندر سلطان راجہ دی زیر صدارت اہم اجلاس ہویاجس وچ الیکشن کمیشن آف پاکستان دت چاراں صوبیاں دے ممبراں تے پنجاب کابینہ دے ارکاناں رلت کیتی، اجلاس وچ عام الیکشن دے انعقادلئی الیکشن کمیشن دے انتظام تے پنجاب حکومت دیاں تیاریاں دا تفصیلی جائزہ لیئا گیا۔اجلاس دے دوران الیکشن کمیشن آف پاکستان ولوں پنجاب وچ عام الیکشن دیاں تیاریاں باے تفصیلی بریفنگ دتی گئی۔اجلاس وچ عام الیکشن لئی سکیورٹی انتظاماں اتے وی بریفنگ دتی گئی،نگران پنجاب حکومت تے الیکشن کمیشن نے عام الیکشن دا پرامن،آزادانہ تے منصفانہ انعقاد یقینی بنان دے عزم دا اظہار کیتا۔عام الیکشن دے انعقاد نوں یقینی بنان لئی نگران پنجاب حکومت الیکشن کمیشن دے نال کوآرڈینیشن لئی فوکل پرسن مقرر کرے گی۔اجلاس دے دوران چیف الیکشن کمشنر سکندر سلطان راجہ دا کہنا سی کہ عام الیکشن دا ویلا نیڑے اے،سب نے مل کے منصفانہ تے شفاف الیکشن نوں یقینی بنانا اے،عام الیکشن مقررہ ویلے اتے ہون گے،نگران پنجاب حکومت نوں فری اینڈ فیئر الیکشن لئی مکمل سپورٹ کراں گے۔اونہاں نے آکھیا کہ 30نومبر تک حلقہ بندیاں دا مرحلہ مکمل ہو جائے گا، الیکشن کمیشن شفاف،آزادانہ تے منصفانہ الیکشن کران لئی تیار اے،نگران وزیراعلی محسن نقوی دی قیادت وچ پنجاب حکومت دے ہن تک دے اقداماں توں مکمل طور اتے مطمئن ہاں۔اجلاس وچ گل بات کر دیاں ہویاں نگران وزیراعلی محسن نقوی دا کہنا سی کہ الیکشن کمیشن دے نال الیکشن دے پرامن تے شفاف انعقاد لئی ہر ممکن تعاون کیتا جائے گا، پنجاب وچ الیکشن دے آزادانہ انعقاد نوں یقینی بنان لئی فول پروف انتظام کیتے جان گے۔اونہاں نے ہور آکھیا کہ نگران پنجاب حکومت دی ٹیم عام الیکشن دے منصفانہ انعقاد نوں یقینی بنان لئی الیکشن کمیشن دی گائیڈ لائن اتے من وعن عمل کرے گی،الیکشن دا منصفانہ،آزادانہ تے پرامن انعقاد قومی ذمہ داری اے جس نوں احسن طریقے نال نبھاواں گے۔الیکشن کمیشن آف پاکستان دے ممبر سندھ نثار احمد درانی، ممبر بلوچستان شاہ محمد جتوئی، ممبر کے پی کے جسٹس راکرام اللہ خان، ممبر پنجاب بابر حسن بھروانہ،سپیشل سیکرٹری الیکشن کمیشن آف پاکستان ڈاکٹر سیدآصف حسین اجلاس وچ رلتی سن۔سپیشل سیکرٹری الیکشن کمیشن آف پاکستان ظفر اقبال حسین،صوبائی الیکشن کمشنر پنجاب سعید گل،چیف سیکرٹری، انسپکٹر جنرل پلس، ایڈیشنل چیف سیکرٹری، ایڈیشنل چیف سیکرٹری داخلہ، محکمیاں دے سیکرٹریاں تے اعلی حکام نے وی اجلاس وچ رلت کیتی۔