غیر قنونی وسن والیاں نوں پاکستان چھڈن دی مہلت ختم

اسلام آباد(پنجابی میڈیا گروپ)غیر قنونی وسن والیاں غیر ملکیاں نوںپاکستان چھڈن دی مہلت ختم ہو گئی، قنون نافذ کرن والے اداریاں نے کارروائی دی تیاری مکمل کر لئی۔اعلی حکام دا کہنا اے کہ غیرقنونی وسن والے غیرملکیاں نوں ملک چھڈن دی ڈیڈ لائن نہیں ودھائی جائے گی، سکیورٹی فورسز نے میپنگ تے جیو فینسنگ کرکے مشکوک افراد دی نشاندہی کر لئی جدکہ وطن واپس جان والیاں نے پاکستان دی مہمان نوازی دی تعریف کیتی۔نگران وزیر داخلہ سرفراز بگٹی نے پریس کانفرنس کردیاں ہویاں آکھیا اے کہ انخلا دا معاملہ غیر قنونی وسن والیان دے خلاف اے کسی مخصوص گروہ خلاف نہیں، ساڈھے اتے کوئی فارن پریشر نہیں نہ اسیں پریشر لیندے ہاں، دنیا دا کوئی وی ملک بغیر ویزے دی وسن دی اجازت نہیں دیندا جیہڑا وی ویزے بغیر غیر ملکی ہوئے گا اوس نوں واپس گھلاں گے۔نگران وفاقی وزیر داخلہ نے آکھیا اے کہ اسیں جیو فینسنگ کیتی اے، لگ بھگ 2لکھ دے نیڑے غیرملکی واپس جا چکے نیں، ہولڈنگ سینٹر وچ فوڈ، ہیلتھ دیاں سہولتاں دیاں گے، جس نے پاکستان آنا اے ویزا لے کے آئے، ایہ تاثرغلط اے کہ صرف افغانستان دے لوکاں نوں کڈیا جا رہیا اے۔