الیکشن11فروری نوں ہون گے،الیکشن کمیشن

اسلام آباد(پنجابی میڈیا گروپ)ملک وچ الیکشن11فروری 2024 نوں ہون گے، الیکشن کمیشن نے سپریم کورٹ نوں دوران سماعت آگاہ کردتا۔90دناں وچ الیکشن کیس دی سماعت دے دوران چیف جسٹس نے وکیل الیکشن کمیشن توں استفسار کیتا کہ الیکشن کمیشن نے کیا الیکشن دی تریخ دتی، جس اتے وکیل الیکشن کمیشن سجیل سواتی نے دسیا کہ ملک وچ الیکشن11فروری نوں ہون گے۔الیکشن کمیشن نے الیکشن دے شیڈول بارے سپریم کورٹ نوں آگاہ کیتا۔وکیل الیکشن کمیشن نے دسیا کہ29جنوری نوں حلقہ بندیاں سنے سارے انتظام مکمل ہو جان گے تے11فروی نوں ملک بھر وچ الیکشن ہون گے۔وکیل ولوں تفصیل وچ ہور دسیا گیا کہ3 توں5دن حتمی فہرستاں وچ لگن گے تے5دسمبر نوں حتمی فہرستاں مکمل ہو جان گیاں،5دسمبر توں54دن گنے جان تے29جنوری بن دی اے۔وکیل الیکشن کمیشن نے دسیا کہ الیکشن وچ عوام دی آسانی لئی اتوار لبھ رہے ساں،4فروی نوں پہلا اتوار بن دا اے جدکہ دوجا اتوار11فروری نوں بن دا اے، اسیں اپنے طور اتے ایہ فیصلہ کیتا کہ 11 فروری والے اتوار نوں الیکشن کروائے جان۔چیف جسٹس نے ریمارکس دتے کہ جیہڑی وی تریخ حتمی آئے گی اوس اتے الیکشن کمیشن نوں پابند کرن ہوراگے پیچھے نہ ہوئے ، اسیں الیکشن کمیشن دا کم خود نہیں کراں گے مگر اونہاں نوں پابند کراں گے۔