غزہ اتے اسرائیل دا جنگی جنون برقرار،24گھنٹیاں وچ ہور271فلسطینی شہید

غزہ (پنجابی میڈیا گروپ)اسرائیلی فوج دی غزہ دی پٹی اتے وحشیانہ بمباری جاری اے ، صیہونی فوج نے پچھلے 24گھنٹیاں دوران ہور271فلسطینیاں نوں شہید کردتا، مجموعی شہادتاں دی تعداد9ہزار توں ودھ ہوچکیاں نیں۔غزہ وچ اسرائیلی مظالم ہر حد وں گزر گئے، پچھلے2دناں دے دوران جبالیہ پناہ گزین کیمپ اتے اسرائیل دے حملیاں وچ195فلسطینی شہید جدکہ700 توں ودھ زخمی ہوگئے۔میڈیا رپورٹ دے مطابق وسطی غزہ وچ اسرائیلی طیاریاں دی بمباری نال اک ہی خاندان دے8افراد شہید ہوگئے، جبالیہ پناہ گزیں کیمپ دے الفلوجہ علاقے وچ گھراں اتے درجناں میزائلاں نال حملے کیتے گئے ، ایس حملے بارے اسرائیل نے آکھیا کہ حماس دے رہنما نوں نشانہ بنایا گیا سی۔پچھلے دناں کیتے جان والے فضائی حملے تے توپ خانے نال شیلنگ بعد علاقے وچ مواصلاتی نظام مکمل طوراتے منجمد ہوگیا ، فلسطینی وزارت مواصلات نے غزہ دی پٹی نال سارے مواصلاتی تے انٹرنیٹ سروسز دے مکمل طوراتے بند ہون دی تصدیق کیتی۔