رہبر نوں راہزن بنان والے کردار بے نقاب ہو رہے نیں،فردوس عاشق اعوان

ٹیکسلا( پنجابی میڈیا گروپ)استحکام پاکستان پارٹی دی ترجمان فردوس عاشق اعوان نے آکھیا کہ رہبر نوں رہزن بنان والے کردار بے نقاب ہورہے نیں۔استحکام پاکستان پارٹی دی ترجمان فردوس عاشق اعوان نے جلسہ نال خطاب کردیاں ہویاں آکھیا کہ آئی پی پی ملک نوں سیاسی تے معاشی استحکام وَل اگے لے کے چلنا چاہندی اے، میں آپ وی چیئرمین پی ٹی آئی دے بیانیے دا سیاسی مورچے اُتے دفاع کردی رہی، میں بھُل گئی ساں کہ رہبردے گھر وچ ہی رہزن بیٹھے ہوئے سن۔فردوس عاشق اعوان نے آکھیا کہ قومی خزانہ دن بدن خالی ہورہیا سی، کرپشن دی عجب کہانی میڈیااُتے چلی اے، ایہ سارا قوم دا لُٹیا ہویا پیسہ قوم اُتے خرچ ہونا چاہیدا اے، ساڈھا بیانیہ عوام دے دلاں دے نال جڑیا ہویا اے،اسیں عوام دے دکھاں دی مرہم لے کے آئے ہاں، مرہم لگان تے زخم لان والے ہتھ اک جگہ نہیں ہوسکدے۔ترجمان استحکام پاکستان پارٹی نے آکھیا کہ اقتدار دے مزے لٹن والیاں توں پاکستان نہیں بدلیا گیا، اسیں پی ٹی آئی دے پلیٹ فارم توں نظام بدلنا چاہندے ساں،لیکن ادھورے خواب دی تعبیر آئی پی پی دے پلیٹ فارم توں کراں گے۔