جنرل (ر)فیض نے مینوں جیل گھلیااوہ آرمی چیف بننا چاہندا سی،علیم خان

ٹیکسلا(پنجابی میڈیا گروپ)استحکام پاکستان پارٹی دے صدر علیم خان نے آکھیا اے کہ جنرل(ر)فیض نے مینوں جیل گھلیا اوہ آرمی چیف بننا چاہنداسی ، عمران خان جو کہندے سن سب نوں رُلاواں گا اج خود جیل وچ بیٹھے رو رہے نیں۔ٹیکسلا وچ تقریب نال خطاب کردیاں ہویاں صدر استحکام پاکستان پارٹی (آئی پی پی)علیم خان نے آکھیا کہ اسیں سارے اک جماعت وچ 2011 نوں شامل ہوئے، جہانگیر ترین علاج دے بعد گھر نہیں گئے سیدھا اسلام آباد دھرنے وچ پہنچے، اسیں نویں پاکستان لئی بھرپور کوشش کیتی تے جو ممکن سی اسیں کیتا کوئی کسر وی نہیں چھڈی،کوشش کیتی کہ ایہ ملک خوشحال ملک بن جائے۔اونہاں نے آکھیا کہ2011 وچ پی ٹی آئی دے کول اک کونسلر وی نہیں سی تے اسیںاوس توں پہلے وزیر بن چکے ساں، اسیں روایتی سیاست توں وَکھ ہو کے نویں پاکستان لئی چل پئے لیکن پی ٹی آئی دا لیڈر کسی دے نال مخلص نہیں سی اوہ شخص اپنی اولاد دے نال وی مخلص نہیں سی، کوئی شخص ساڑھے 3ورھے تک وزیراعظم رہے تے اوہ پُتراںدے نال نہ ملے، جنہے دن اوہ وزیراعظم رہیا اوہ اپنی اولاد دا نہیں رہیا اوس نے ساڈھا کیہ ہونا سی۔