بلے دانشان:الیکشن کمیشن آئینی ادارہ اے،مداخلت نہیں کرسکدے،سپریم کورٹ

اسلام آباد(پنجابی میڈیاگروپ)سپریم کورٹ آف پاکستان نے پاکستان تحریک انصاف دے انتخابی نشان بلے بارے مقدمے دی سماعت اُتے ریمارکس دیندیاں ہویاں آکھیا اے کہ اگر انٹراپارٹی الیکشن درست نہ ہوئے تے پی ٹی آئی نوں نتجہ بھگتنا پئے گا،بنیادی چیز جمہوریت اے، ملک تے سیاسی جماعتاں وچ وی جمہوریت ہونی چا ہیدی اے،کسی آئینی ادارے دا کم خود نہیں کراں گے۔ جمعہ نوں چیف جسٹس قاضی فائز عیسیٰ دی سربراہی وچ جسٹس محمد علی مظہر، جسٹس مسرت ہلالی اُتے مشتمل 3 رکنی بینچ نے کیس دی سماعت کیتی ۔الیکشن کمیشن دے وکیل مخدوم علی خان تے قنونی ٹیم، پی ٹی آئی دے بیرسٹر گوہر علی خان، وکیل حامد خان، وکیل شعیب شاہین، پی ٹی آئی چیف الیکشن کمشنر نیاز اللہ نیازی وی کمرہ عدالت وچ موجود رہے، اوس دے علاوہ علی ظفر لہور رجسٹری توں ویڈیو لنک اُتے موجود سن۔الیکشن کمیشن دے وکیل مخدوم علی خان روسٹرم اُتے آئے تے چیف جسٹس نے سوال کیتا کہ کیا پشور ہائی کورٹ دا تفصیلی فیصلہ آ گیا اے؟ جس اُتے پی ٹی آئی دے وکیل حامد خان نے عدالت نوں جواب دتا کہ تفصیلی فیصلہ اجے نہیں آیا۔بعد وچ مخدوم علی خان نے بلے دا نشان واپس کرن دا فیصلہ پڑھ کے سنایا، جس دے بعد تحریک انصاف دے وکیل حامد خان نے موقف اپنایا کہ ساہنوں کوئی نوٹس موصول نہیں ہویا۔چیف جسٹس قاضی فائزعیسیٰ نے حامد خان توں سوال کیتا کہ تُسی مقدمے لئی کَدوں تیار ہوو گے؟جس اُتے پی ٹی آئی دے وکیل نے جواب دتا کہ پیر نوں سماعت رکھ لوں۔وکیل الیکشن کمیشن نے آکھیا کہ (اج) ہفتہ نوں امیدواراں نوں انتخابی نشان الاٹ ہونے نیں جس اُتے چیف جسٹس نے آکھیا کہ پیر تک سماعت ملتوی کرن لئی ہائی کورٹ دا حکم معطل کرنا پئے گا، اسیں تے ہفتے، اتوار نوں وی سماعت لئی تیار ہاں جس اُتے وکیل حامد خان نے جواب دتا کہ ایس صورت وچ تیاری لئی (اج) ہفتہ تک دا ویلا دیو۔