NASTPمنصوبے توں اگلی نسل بوہت فائدہ چُکے گی،آرمی چیف

کراچی(پنجابی میڈیاگروپ)آرمی چیف جنر عاصم منیر نے آکھیا اے کہ نیشنل ایرو سپیس سائنس اینڈ ٹیکنالوجی دے منصوبے توں نوجوان تے اگلی نسل بے پناہ فائدہ چُکے گی۔پاک فوج دے شعبہ تعلقات عامہ(آئی ایس پی آر)مطابق چیف آف آرمی سٹاف سید عاصم منیر نے نیشنل ایرو سپیس سائنس اینڈ ٹیکنالوجی پارک سلیکون دے دُوجے باب دی افتتاحی تقریب وچ بطور اُچیچے پروہنے رَلت کیتی۔سربراہ پاک فضائیہ نے منصوبے دے ویژن اُتے روشنی پاندیاں ہویاں آکھیا کہ ایہ منصوبہ ایروسپیس، سائبر تے آئی ٹی دے حوالے نال بہترین منصوبہ اے، قومی سطح اُتے اُبھر دی ہوئی ٹیکنالوجی حاصل کرن لئی درست پاسے قدم اے، ایہ منصوبہ سماجی، اقتصادی، سکیورٹی تے سائنس دے شعبیاں وچ سانجھا ویژن ثابت ہوئے گا۔آرمی چیف نے ایروسپیس سائنس دے شعبے وچ پاک فضائیہ دیاں کوششاںنوں سراہیا، آرمی چیف نے نیشنل ایرو سپیس سائنس اینڈ ٹیکنالوجی نوں قومی تے سٹریٹجک اہمیت دا منصوبہ قرار دیندیاں ہویاں آکھیا کہ منصوبے نال ملک نوں کئی فائدے حاصل ہون گے کیونکہ ایہ تکنیکی ترقی تے قوم لئی اک پلیٹ فارم پیش کرکے خود انحصاری نوں ودھائے گا۔بعد وچ آرمی چیف نے کور ہیڈ کوارٹرز کراچی دا وی دورہ کیتا، کور کمانڈر کراچی نے آرمی چیف نوں جی آیاں نوں آکھیا تے اونہاں نوں آپریشنل تیاریاں، تربیتی کماں، فوجیاں تے شہیداں دے وارثاں دی فلاح و بہبود لئی کیتے جان والے انتظامی اقداماں توںآگاہ کیتا۔