میرا قصور صرف ایبسلوٹلی ناٹ کہنا اے، عمران خان

اسلام آباد(پنجابی میڈیاگروپ)پی ٹی آئی دے وکیل نعیم پنجوتھا نے دسیا اے کہ عمران خان نے آکھیا اے کہ اونہاں دا قصور صرف ایبسلوٹلی ناٹ کہنا اے۔اڈیالہ جیل دے باہر میڈیا نال گل بات کردیاں ہویاں پی ٹی آئی دے وکیل نعیم حیدر پنجھوتھا نے آکھیا کہ جس وکیل بارے لگدااے کہ اوہ فرد جرم روکے گا اوس نوں اڈیالہ دے باہر روک لیا جاندا اے، عمران خان نے آکھیا اے کہ میرا قصور ایبسلولٹی ناٹ کہنا اے مینوں بوہت پہلاں سیکریٹ ایکٹ تحت کارروائی دا آکھیا گیا لیکن میں حقیقی آزادی لئی ڈٹ گیا۔نعیم پنجھوتھا نے عمران خان نال کیتی گئی گل بات بیان کیتی، عمران خان نے اونہاں نوں دسیا اے کہ چھوٹے چور نوں کوئی سزا نہیں ہُندی وڈھے چوراں نوں کلین چٹ دے دتی جاندی اے سازش کرن والیاں اُتے کوئی کیس نہیں اے جس نے سازش نوں ایکسپوز کیتا اوس نوں سزا دتی جارہی اے عون چوہدری گواہ اے یعنی جیہڑاساہنوں الیکشن توں باہر رکھنا چاہندے نیں اونہاں نوںساڈھے خلاف گواہ بنایا گیا اے ایسی گواہی دی کیہ اہمیت ہوئے گی؟نعیم پنجوتھا مطابق عمران خان نے آکھیا کہ توشہ خانہ وچ شیواں لین لئی جیہڑا قنون سی اوہ پورا کیتا گیا اے گڈی جس نوں توشہ خانہ توں لے ہی نہیں سکدے سن اوس اُتے کوئی سوال نہیں جان بجھ کے ایسے مقدمے بنائے گئے نیں،12مہینیاں توں ساڈھی درخواست ہائی کورٹ وچ زیر التوا اے، ساڈھی توشہ خانہ بارے نہ درخواست واپس لین دتی جارہی تے نہ کیس چلن دتا جارہیا اے۔نعیم پنجوتھا دے مطابق عمران خان نے آکھیا کہ نواز شریف نے اپنی سیاست ختم کر لئی اے اسلام آباد ہائی کورٹ، جوڈیشل کمپلیکس دی سی سی ٹی وی فوٹیجز کیوں سامنے نہیں آرہی؟9مئی واقعے دی پوری تحقیقات ہونی چا ہیدی اے۔