عوامی خدمت لئی الیکشن لڑرہے ہاں، بلاول بھٹو

مکوآنہ(پنجابی میڈیاگروپ)پی پی پی دے چیئرمین بلاول بھٹو زرداری نے آکھیا کہ پی پی پی عوامی خدمت لئی الیکشن لڑرہی اے، اسیں بیروزگاری تے غربت ختم کراں گے تے جیہڑا عوامی خدمت دا سفر قائد عوام ذوالفقار علی بھٹو نے شروع کیتا تے جس نوں مکمل کر دیاں بی بی شہید نے اپنی جان دا نذرانہ پیش کیتا اسیں اوس عوامی خدمت داتسلسل جاری رکھاں گے۔ اوہ فیصل آباد دورے دے بعد میڈیا نال گل بات کر دیاں آکھیاکہ ساہنوں منشور تے شعور شہید بی بی نے دتاایس لئی اگر تُسی پیپلز پارٹی نوں جتواندے او تے اسیں 10 نکاتی ایجنڈے اُتے عملدرآمد کرکے ملک و قوم دی تقدیر بدل دیاں گے۔اونہاں نے آکھیاکہ وسیلہ حق وسیلہ روزگار پیپلز پارٹی دے منصوبے نیں جدکہ بینظیر انکم سپورٹ پروگرام ونگوں ہر شعبہ لئی ایسے فلاحی منصوبے شروع کراں گے جس نال گھر گھر خوشحالی آسکے، بدترین مہنگائی، غربت و بیروزگاری ختم کراں گے، صنعتاں دا پہیہ چلے گا،مزدوراں نوں روزگار ملے گا، کسان خوشحال ہوئے گا تے زرعی انقلاب آئے گا۔ تاندلیانوالہ سنے جیتھے لوڑ پئی نویاں یونیورسٹیاں بناواں گے، جس طرح سندھ تے بلوچستان وچ سیلاب متاثرین لئی 20لکھ گھر بنوا رہے ہاں ایسی طرح پنجاب وچ وی 30لکھ گھر بناواں گے۔بلاول بھٹونے جلسہ دے رَلتیاںنوں آکھیاکہ تُسی کسان دے کول جانا اے تے دسنا اے کہ اسیں کسان کارڈ لیاواں گے۔عورتاں نوںگھر گھر جا کے دسو کہ ذوالفقار علی بھٹو شہید دے ملکیتی حقوق دین دے تسلسل تے بے نظیر مزدور کارڈ ذریعے مزدور تے اوس دے بالاں نوں فائدہ ہوئے گا،ہر قسم دے مزدورنوں بے نظیر مزدور کارڈ دتاجائے گا۔