بلاول بھٹو اک نویں سوچ دے نال میدان وچ آئے نیں،مراد علی شاہ

سیہون شریف( پنجابی میڈیا گروپ)سابق وزیراعلی سندھ سید مرادعلی شاہ نے آکھیا اے کہ ایس ملک نوں اک نویں سوچ دی لوڑ اے، بلاول بھٹو اک نویں سوچ دے نال میدان وچ آئے نیں۔یونین کونسل بوبک وچ جلسے نال خطاب کر دیاں ہویاں مراد علی شاہ دا کہنا سی کہ الحمداللہ لوکاں دی محبت بلاول بھٹو نال اے، ایس ملک نوں اک نویں سوچ دی لوڑ اے، لوکاںنوں اک ہی انتظار اے کہ8 فروری نوں تیر دے نشان اُتے ٹھپہ مار کے پیپلز پارٹی نوں کامیاب کرو۔اونہاں نے آکھیا کہ نیب نوں ختم کرن دے نواز لیگ دے اعلان دی حمایت کردا ہاں، دیر آئے درست آئے، 2014 وچ آصف زرداری نے نیب ختم کرن دا آکھیا سی، نواز لیگ نے اپنے منشور وچ نیب ختم کرن دا کہہ کے آصف زرداری دے فیصلے دی تائید کیتی اے۔مراد علی شاہ دا ہور کہنا سی کہ وزارت اعلی دا فیصلہ پارٹی قیادت کرے گی، ساڈھی حکومت نے گریڈ1 توں 4 تک نوکریاں دتیاں مگر کجھ لوکاں نے عدالت وچ جا کے اوہ نوکریاں رکوایاں، اسیں وفاق تے صوبائی حکومت وچ آ کے دوبارہ لو کاں نوں روزگار دیاں گے، میرٹ اُتے نوجواناں نوں نوکریاں دیاں گے۔