سائفر کیس:بانی پی ٹی آئی تے شاہ محمود قریشی نوں10،10ورھے قید بامشقت دی سزا

راولپنڈی(پنجابی میڈیاگروپ)سائفر کیس وچ بانی پاکستان تحریک انصاف(پی ٹی آئی) تے شاہ محمود قریشی نوں10،10ورھے قید بامشقت دی سزا سنا دتی گئی۔راولپنڈی دی اڈیالہ جیل وچ قائم خصوصی عدالت نے سائفر کیس وچ بانی پی ٹی آئی تے شاہ محمود قریشی نوں سزا سنائی۔آفیشل سیکرٹ ایکٹ تحت قائم خصوصی عدالت دے جج ابوالحسنات ذوالقرنین نے زبانی مختصر فیصلہ سنایا، ایس موقع اُتے بانی پی ٹی آئی تے شاہ محمود قریشی وی کمرہ عدالت وچ موجود سن۔ایس موقع اُتے بانی پی ٹی آئی تے شاہ محمود قریشی نے بیان دتا کہ ساڈھے وکیل موجود نہیں اسیں کس طرح بیان ریکارڈ کراواں گے؟جج ابوالحسنات ذوالقرنین نے بانی پی ٹی آئی تے شاہ محمود قریشی توں آکھیاکہ تہاڈے وکیل حاضر نہیں ہو رہے، تہانوں سٹیٹ ڈیفنس کونسل فراہم کیتی گئی۔وکیل صفائی نے سوال کیتا کہ اسیں جرح کر لیندے ہاں کہ جس اُتے جج نے وکلا صفائی توں آکھیا کہ تُسی میرے اُتے پر عدم اعتماد کیتا اے۔بعد وچ بانی پی ٹی آئی دا 342 دا بیان کمرہ عدالت وچ ریکارڈ کیتا گیا جس وچ اونہاں نے آکھیا کہ سائفر میرے آفس آیا سی لیکن اوس دی سکیورٹی دی ذمہ داری ملٹری سیکرٹری دی سی، ایس حوالے نال ملٹری سیکرٹری نوں انکوائری دا آکھیا سی، اونہاں نے دسیا کہ سائفر بارے کوئی کلیو نہیں ملیا۔عدالت نے بانی پی ٹی آئی دا342 دا بیان ریکارڈ کرن تے مختصر سماعت بعد کیس دا فیصلہ سناندیاں ہویاں آکھیا کہ سائفر کیس وچ بانی پی ٹی آئی تے شاہ محمودنوں10،10ورھے قید بامشقت دی سزا سنائی جاندی اے ،آفیشل سیکرٹ ایکٹ تحت قائم عدالت دے جج ابوالحسنات نے کیس دا مختصر زبانی فیصلہ سنایا۔واضح رہے کہ ایس توں پہلاں بانی پی ٹی آئی نے سائفر کیس وچ سرکاری وکلا صفائی دی تقرری نوں اسلام آباد ہائیکورٹ چیلنج کیتا سی۔