سائفر کیس وچ عدالت نے ملک دشمناں دا انجام دَس دتا،فردوس عاشق

لہور(پنجابی میڈیاگروپ)استحکام پاکستان پارٹی دی مرکزی سیکرٹری اطلاعات ڈاکٹر فردوس عاشق اعوان نے آکھیا اے کہ سائفر کیس وچ عدالت نے ملک دشمن سوچ نوں انجام دَس دتا۔مرکزی رہنما استحکام پاکستان پارٹی ڈاکٹر فردوس عاشق نے سائفر کیس وچ بانی پی ٹی آئی تے شاہ محمود قریشی نوں سزا دے فیصلے اُتے رد عمل دیندیاں ہویاں آکھیا کہ عدالت نے 10،10 ورھے قید با مشقت دی سزا سنا کے ملک دشمناں نوں واضح پیغام دتا۔اونہاں نے آکھیا کہ ملک دی نظریاتی اساس تے مفاد خلاف ہر سوچ دا انجام قید با مشقت دے سوا کجھ نہیں اے،سائفر معاملے وچ قومی سلامتی نوں بیچ چوراہے ننگا کرن دی کوشش کیتی گئی۔سیکرٹری اطلاعات استحکام پاکستان پارٹی نے آکھیا کہ بانی پی ٹی آئی نے کشمیریاں دے حق توں منہ موڑ کے کشمیر کاز نال غداری کیتی تے جس ملک اُتے حکمرانی کیتی اوسی دیاں جڑاں نوں کھوکھلا کیتا، جیہڑی ملک دشمنی دی بد ترین مثال اے۔فردوس عاشق اعوان دا کہنا سی کہ انشا اللہ الیکشن دے بعد مضبوط عوامی حکومت ملک نوں بحراناں توں کَڈے گی، جمہوری روایت تے الیکشن نال ہی ملک وچ معاشی و سیاسی استحکام آئے گا، استحکام پاکستان پارٹی معاشی و سیاسی استحکام دے نال میدان وچ آئی اے۔