گیس دااوسط ٹیرف ہور35.13فیصد تک ودھان دی منظوری

اسلام آباد(بیورورپورٹ)آئل اینڈ گیس ریگولیٹری اتھارٹی (اوگرا)نے عالمی مالیاتی ادارے(آئی ایم ایف)دی اک ہور شرط پوری کرن دی تیاری کردیاں ہویاں گیس دااوسط ٹیرف ہور35.13فیصد تک ودھان دی منظوری دے دتی۔اوگرا نے اسلام آبادسنے، پنجاب تے کے پی دے گیس صارفین لئی ٹیرف وچ اوسط35.13فیصد جدکہ سندھ تے بلوچستان دے گیس صارفین لئی ٹیرف وچ اوسط8.57فیصد ودھان دی منظور دتی اے۔فیصلے مطابق سوئی ناردرن داٹیرف435.14روپے فی ایم ایم بی ٹی یوتک ودھان دی اجازت دتی گئی اے،سوئی ناردرن لئی نوا ٹیرف1673.82روپے فی ایم ایم بی ٹی یوکردتا گیا اے۔اوگرا نے سوئی سدرن دا ٹیرف 115.72 روپے فی ایم ایم بی ٹی یو ودھان دی منظوری دے دتی اے جدکہ سوئی سدرن لئی نواٹیرف 1466.40 روپے فی ایم ایم بی ٹی یوکردتا۔اوگرا نے گیس دی قیمت وچ ودھان دا فیصلہ وفاقی حکومت نوں گھل دتا اے،وفاقی حکومت دی منظوری دے بعد اوگرا نوٹی فکیشن جاری کرے گا۔