بلوچستان وچ دھماکیاں دی گونج،24افرادجاں بحق

پشین(بیورورپورٹ)الیکشن توں 1دن پہلاں بلوچستان دے2ضلعیاں وچ دھماکے ہوئے جس دے نتیجے وچ مجموعی طور اُتے24 افراد جان دی بازی ہار گئے ۔پہلا دھماکا بلوچستان دے ضلع پشین دے علاقے خانوزئی وچ ہویا جس وچ12افراد جاں بحق ہوئے جَد کہ دُوجا دھماکا قلعہ سیف اللہ وچ جے یو آئی (ف) دے دفتر دے باہر ہویا جس وچ12افراد جاں بحق ہوئے ۔خانوزئی وچ ہون والے دھماکے دے بعد علاقے وچ کھڑیاں موٹرسائیکلاں تباہ ہوگئیاں تے دھماکے دے نتیجے وچ کئی افراد زخمی ہوئے جدکہ12 افراد دے جاں بحق ہون دی تصدیق ہوئی اے۔پلس دا کہنا اے کہ دھماکے دی اطلاع ملدیاں ہی پلس دی بھاری نفری علاقے وچ پہنچ گئی تے زخمیاں نوں ہسپتال منتقل کیتا گیااے۔خانوزئی ہسپتال دے میڈیکل سپرنٹنڈنٹ نے 12افراد دے جاں بحق ہون دی تصدیق کردتی،30 توں وَدھ زخمیاں نوں ہسپتال لیایا گیا اے جنہاں وچوں کئیاںدی حالت تشویشناک اے۔دھماکا الیکشن وچ حصہ لین والے امیدوار تے سابق وزیر اسفند یار کاکڑ دے دفتر باہر ہویا اے،خوش قسمتی نال اوہ دفتر وچ موجود نہیں سن، دھما کے دے ویلے علاقے وچ وڈھی تعداد وچ لوگ جمع سن جدکہ ہور سیاسی جماعتاں دے دفتر وی ایس علاقے وچ نیں۔