ن لیگ،پیپلز پارٹی،ایم کیو ایم،ق لیگ،بی این پی،آئی پی پی دامل کے حکومت بنان دااعلان

اسلام آباد(بیورورپورٹ)وفاق تے صوبیاں وچ حکومت بنان لئی پاکستان مسلم لیگ (ق) دے سربراہ چودھری شجاعت حسین دی رہائش اُتے اتحادی جماعتاں دے لیڈراں دا اہم اجلاس ہویا جس وچ ساریاں رہنماواں نے مل کے حکومت بنان دا اعلان کیتا۔اجلاس وچ شہباز شریف، آصف زرداری، خالد مقبول صدیقی، فاروق ستار، صادق سنجرانی، علیم خان، طارق بشیر چیمہ، گورنر سندھ کامران ٹیسوری، سنے ہور رہنماواں نے رَلت کیتی۔اجلاس دے آخیراُتے میڈیا نال گل بات کردیاں ہویاں سابق صدر آصف علی زرداری نے آکھیا کہ اج اسیں تہیہ کیتا اے کہ آپس وطچ مل بیٹھ کے حکومت بناواں گے،ساڈھے اُتے قرض بوہت اے تے ویکھا اے کہ اوس دیاں قسطاں کِنیاں رہ گئیاں نیں۔آصف زرداری نے آکھیا کہ ، اسیں اک دُوجے خلاف الیکشن لڑے نیں ۔ اسیں اکٹھے بیٹھ سکدے ہاں، گل کر سکدے ہاں، چاہندے ہاں پی ٹی آئی وی مفاہمت وچ شامل ہوئے ۔ایس موقع اُتے خالد مقبول صدیقی نے آکھیاکہ اسیں سارے مل کے باہمی تعاون نال جمہوریت نوں مضبوط کراں گے، چیئرمین سینیٹ صادق سنجرانی نے آکھیا کہ اسیں پہلاں وی اکٹھے ساں فیر اکٹھے ہو کے پاکستان دی جمہوریت نوں سنبھالاں گے، اسیں ایس سارے معاملات وچ میاں نواز شریف دے نال کھڑے ہاں۔