امید اے کہ ایس وار فضل الرحمن بانی پی ٹی آئی دا ساتھ دیون گے،علی محمد خان

اسلام آباد(بیورورپورٹ)پاکستان تحریک انصاف دے رہنما علی محمد خان نے آکھیا اے کہ محمود اچکزئی دے گھر چھاپہ افسوس ناک اے ،ساہنوں امید اے کہ حق دی جت ہوئے گی تے چنگا مقابلہ ہوئے گا، امید اے مولانا فضل الرحمن ایس بار حق دے رستے اُتے بانی پی ٹی آئی دا ساتھ دیون گے۔اسلام آباد الیکشن آفس دے باہر محمود اچکزئی دے ہمراہ میڈیا نال گل بات کردیاں ہویاں پی ٹی آئی دے رہنما علی محمد خان نے آکھیا کہ اسیں محمود خان اچکزئی نوںصدر لئی نامزدکیتا اے، اونہاں دے کاغذاں دی جانچ پڑتال دا عمل مکمل ہوچکا تے کاغذات منظور ہوگئے۔اونہاں نے آکھیا کہ جَد ساڈھی حکومت بنی تے بلوچستان توں قاسم سوری نوں ڈپٹی سپیکر بنایا سی، محمودخان اچکزئی نال ساڈھاوی سیاسی اختلاف رہیا اے، سیاست سیاستداناں دا کم اے، قوم اپنی فوج تے اداریاں دے نال یک جان ہو کے کھڑی اے۔