اسلامو فوبیا پاروں مسلماناں دے نال ناروا تے امتیازی سلوک روا رکھیا جاندا اے،مریم نواز

لہور(پنجابی میڈیا)وزیر اعلی پنجاب مریم نواز شریف نے اسلامو فوبیا نال نمٹن دے عالمی دن اُتے اپنے پیغام وچ آکھیا اے کہ اسلامو فوبیا دی پر زور مذمت کردی ہاں ،اسلامو فوبیا پاروں مسلماناں دے نال ناروا تے امتیازی سلوک روا رکھیا جاندا اے۔اپنے بیان وچ اونہاں نے آکھیا کہ اسلامو فوبیا ہی اے کہ فلسطین تے کشمیر وچ معصوم مسلماناں نوںظلم وجبر دا شکار کیتا جا رہیا اے ،اسلام پر امن دین اے تے مسلمان امن اُتے یقین رکھدے نیں،اسلام ہی اوہ دین اے جس نے بنیادی انسانی حقوق دتے۔مریم نواز شریف نے آکھیا کہ اسلامو فوبیاروکن لئی اسلامی دنیا دے چہرے نوں مثبت انداز وچ پیش کرن دی لوڑ اے،مسلم ملکاں نوں آپس دی نااتفاقی ختم کر کے اتحاددی علامت بننا چاہیدا اے اسلامی اقدار اُتے من و عن عمل تے ساڈھا انفرادی طرز عمل اسلامو فوبیانوں مات دین وچ بوہت اہم کردار ادا کر سکدا اے