آئی ایم ایف دی دنیا دے غریب ترین ملکاں دی فہرست جاری؛ پاکستان وی شامل

اسلام آباد ( بیورورپورٹ)بین الاقوامی مالیاتی فنڈ(آئی ایم ایف)نے اپنی اک رپورٹ وچ دنیا دے غریب ترین ملکاں دی فہرست جاری کیتی اے جس وچ جنوبی سوڈان 492.72 ڈالر فی کس جی ڈی پی دے اعتبار نال پہلے نمبر اُتے اے۔امریکی مالیاتی جریدے فوربس دے مطابق آئی ایم ایف نے ایہ فہرست ملکی آبادی دی فی کس جی ڈی پی تے لوکاں دی قوت خرید دی صلاحیت اُتے ترتیب دتی اے۔جی ڈی پی ملک دی مجموعی اقتصادی پیداوار دا پیمانہ اے جَد کہ لوکاں دی قوتِ خرید معیارِ زندگی دا تعین کردی اے۔جنوبی سوڈان جس نے 2011 وچ آزادی حاصل کیتی سی، دنیا دا سب توں نوا ملک اے تے اپنی 492.72 فی کس جی ڈی پی دے نال دنیا دا غریب ترین ملک وی اے جس دی بنیادی وجوہات وچ سیاسی عدم استحکام، تنازعات، تے محدود انفراسٹرکچر نیں۔آئی ایم ایف دی دنیا دے غریب ترین ملکاں دی فہرست وچ اولین 10 نمبراں اُتے افریقی ملک شامل نیں۔ فہرست وچ جنوبی سوڈان دے بعد دُوجا نمبر برونڈی دا اے جس دی فی کس جی ڈی پی 936.42 ڈالر اے۔ایسی طرح تریجے تے چوتھے نمبر وی افریقی ملک وسطی افریقی جمہوریہ تے عوامی جمہوریہ کانگو براجمان نیں۔ موزمبیق دا نمبر پنجواں جَد کہ اوس دے بعد بالترتیب ملاوی، نائیجر، چاڈ، لائیبیریا تے مڈغاسکر دا نمبر آندا اے۔غریب ترین ملکاں دی فہرست وچ نیپال دا نمبر 40 اے۔ ایس طرح جنوبی ایشیا دا سب توں غریب ترین ملک نیپال اے۔ اوس دے نال ہی پاکستان دا نمبر 52 واں اے جَد کہ بنگلادیش 62 تے بھارت 63 ویں نمبر اُتے اے۔