پی ٹی آئی دا آئی ایم ایف نوں خط لکھنا ملک دشمنی دے مترادف اے،خواجہ آصف

سیالکوٹ (بیورورپورٹ)وزیر دفاع خواجہ آصف نے آکھیا اے کہ تحریک انصاف دا عالمی مالیاتی ادارے (آئی ایم ایف)نوںخط لکھنا ملک دشمنی دے مترادف اے۔ میڈیا نال گل بات کردیاں ہویاں اونہاںنے آکھیاکہ میں میر علی وچ اَت گرد واقعہ دی مذمت کردا ہاں، اَت گردی خلاف جنگ لڑن لئی اتحاد ضروری اے۔اونہاں نے آکھیا کہ پچھلے دناں لیفٹیننٹ کرنل، کیپٹن تے ساڈھے جوان شہید ہوئے، اَت گردی خلاف قربانی دین والے ساڈھے محسن نیں۔خواجہ آصف نے آکھیا کہ شہیداں دے خلاف اک سیاسی جماعت نے سوشل میڈیا اُتے مہم چلائی، اونہاں دیاں شہادتاں دا مذاق اڑایا، وطن دے نال ایس توں وڈھی ملک دشمنی ہو ہی نہیں ہوسکدی اے۔اونہاںنے آکھیا کہ اج اگر ملک قائم اے تے اینہاں شہیداں دیاں قربانیاں پاروں اے۔خواجہ آصف نے دسیا کہ افغان حکومت دے ساہمنے اَت گردی دا مسئلہ چُکیا اے۔