رانا مشہود دا نتیجے خلاف الیکشن ٹربیونل نال رجوع کرن دا اعلان

لہور( پنجابی میڈیا) پاکستان مسلم لیگ (ن) دے سینئر رہنما رانا مشہود احمد نے آکھیا اے کہ الیکشن2024 وچ سب توں وَدھ دھاندلی پی ٹی آئی دے آزاد امیدواراں کیتی ،الٹا چور کوتوال نوں ڈانٹے دی کہاوت اُتے عمل کردیاں ہویاں پورے ملک وچ دھاندلی دا شور تے واویلا شروع کر دتا گیا اے جس دی اک مثال پی پی 172 وچ سرعام دھاندلی تے ڈِھٹائی دی صورت وچ ملدی اے۔ایکس اُتے جاری اپنے بیان وچ اونہاں نے آکھیا کہ میاں اظہر نے ایس حلقے وچ آر او دے نال مل کے اصل نتیجے نوں تبدیل کیتا۔9فروری 2024 نوں صبح 2 وجے تک رانا مشہود احمد خاں 6500 ووٹاں توں جیت رہیا سی،آر او نے ملی بھگت کر دیاں ہویاں فارم 45 دی گنتی دی بجائے فارم 47 وچ رانا مشہود احمد نوں2730 ووٹاں توں ہرا دتا ۔