مونس الٰہی نوں ضمنی الیکشن لڑن دی اجازت مل گئی،ریٹرنگ افسر دا فیصلہ کالعدم قرار

لہور(پنجابی میڈیا)لہورہائیکورٹ دے اپیلیٹ ٹریبونل نے سابق وزیراعلیٰ چودھری پرویز الٰہی دے صاحبزادے چودھری مونس الٰہی نوں ضمنی الیکشن لڑن دی اجازت دے دتی۔لہورہائیکورٹ دے اپیلیٹ ٹریبونل وچ ریٹرنگ افسر دے فیصلے خلاف مونس الٰہی دی اپیل اُتے سماعت ہوئی۔ اپیلیٹ ٹریبونل نے ریٹرنگ افسر دا فیصلہ کالعدم قراردے کے مونس الٰہی نوں ضمنی الیکشن لڑن دی اجازت دے دتی۔ریٹرننگ آفیسر نے مونس الٰہی دے پی پی 158 توں کاغذات نامزدگی مسترد کیتے سن۔ایس دے علاوہ جسٹس شاہد بلال نے پاکستان تحریک انصاف دی کارکن صنم جاوید نوں سینیٹ الیکشن لڑن دی اجازت دین دا 11صفحیاں اُتے مشتمل تحریری فیصلہ جاری کردتا۔اپیلٹ ٹربیونل نے تحریری فیصلے وچ آکھیا اے کہ عمر سرفراز چیمہ وی جیل وچ نیں، اونہاں دے کاغذات نامزدگی منظور ہوئے، کسی دے نال امتیازی سلوک نہیں ہونا چا ہیدا۔