وزیراعلی دی ٹرینی سب انسپکٹر یاسر نصیب نال ملاقات

لہور(پنجابی میڈیا)وزیراعلی پنجاب مریم نوازشریف نال ٹرینی سب انسپکٹر یاسر نصیب نے ملاقات کیتی، سی سی پی او وی موجودسن۔وزیراعلی مریم نوازشریف نے ایم پی اے دے سلوک اُتے ٹرینی سب انسپکٹر یاسر نصیب نال اظہار ندامت کیتا، وزیراعلی نے آکھیا کہ ایس واقعہ اُتے میں بوہت شرمندہ ہاں، وزیراعلی نے ٹرینی سب انسپکٹر یاسر نصیب توں پورا واقعہ سنیا۔ٹرینی سب انسپکٹر یاسر نصیب نے دسیا کہ روٹین دا گشت کررہے سن، 2 گڈیاں لنگ رہیاں سن، باغبانپورہ دے علاقے شادی پورہ وچ گڈی دے سیاہ شیشے ویکھ کے روک کے چیک کیتا، ایم پی اے نے اُتر کے آکھیا کہ میں ایس علاقے دا ایم پی اے ہاں، تسی چیک کیوں کیتااے۔یاسر نصیب نے ہور دسیا کہ میں نے ایم پی اے نوں دسیا کہ میری ڈیوٹی اے، میں اپنی ڈیوٹی کیتی اے، کوئی بری گل نہیں، ایم پی ا ے نے آکھیاکہ میرے علاقے وچ مینوں روک کے چیک کرن نال میری عزت نفس مجروح ہوئی اے، ایم پی اے نے مینوں سر عام معافی منگن دا مطالبہ کیتا۔