سپریم کورٹ نے فوجی عدالتاں نوں محفوظ شدہ فیصلے سنان دی مشروط اجازت دے دتی

اسلام آباد(بیورورپورٹ)فوجی عدالتاں وچ سویلینز دے ٹرائل خلاف انٹراکورٹ اپیلاں اُتے سماعت دوران سپریم کورٹ نے فوجی عدالتاںنوں محفوظ شدہ فیصلے سنان دی مشروط اجازت دے دتی۔جسٹس امین الدین خان دی سربراہی وچ6رکنی لارجر بینچ مقدمے دی سماعت کیتی ،جسٹس محمد علی مظہر، جسٹس حسن اظہر رضوی، جسٹس شاہد وحید، جسٹس مسرت ہلالی جسٹس عرفان سعادت خان بینچ وچ شامل نیں۔سماعت دے شروع وچ اٹارنی جنرل نے خصوصی عدالتاں توں15 توں20ملزم رہا کیتے جان داامکان ظاہر کر دتا۔اٹارنی جنرل نے عدالت نوں آگاہ کیتا کہ بریت تے گھٹ سزا والیاں نوں رعایت دے کے رہا کیتا جائے گا، مجموعی طوراتے105ملزم فوج دی تحویل وچ نیں۔اونہاں نے دسیا کہ ملزماں دی رہائی لئی 3مرحلیاں تون گزرنا ہوئے گا، پہلا مرحلہ محفوظ شدہ فیصلہ سنایا جانا، دُوجا مرحلہ اوس دی توثیق ہوئے گی، تریجا مرحلہ گھٹ سزا والیاں نوں آرمی چیف ولوں رعایت دینا ہوئے گئی۔