اہم چیلنجاں نال نمٹن لئی امریکا پاکستان دے نال کھڑا رہے گا،جوبائیڈن دا وزیر اعظم نوں خط

اسلام آباد(بیورورپورٹ)(دنیا نیوز) وزیراعظم شہباز شریف کو امریکی صدر جو بائیڈن نے خط لکھیا اے جس وچ نومنتخب حکومت لئی نیک خواہشاں ظاہر کیتیاں گئیاں نیں۔وزیراعظم دے منصب سنبھالن دے بعد امریکی صدر دا ایہ پہلا خط اے، خط دے متن وچ امریکی صدر نے آکھیا اہم چیلنجاں دا سامنا کرن وچ امریکا پاکستان دے نال کھڑا رہے گا۔خط وچ امریکی صدر جوبائیڈن نے آکھیا اے کہ دوناں ملکاں دی عوام دے وچکار شراکت داری دنیا تے ساڈھی عوام دی سلامتی یقینی بنان وچ نہایت اہم اے ، امریکا پاکستان گرین الائنس فریم ورک توں ماحولیاتی بہتری لئی اسیں اپنے اتحاد نوں ہور مضبوط کراں گے۔امریکی صدر نے خط وچ آکھیا کہ پائیدار زرعی ترقی، آبی انتظام تے سیلاب دے تباہ کن اثرات نال بحالی وچ پاکستان دی معاونت جاری رکھاں گے، صحت عامہ دا تحفظ، معاشی ترقی تے سب لئی تعلیم مشترکہ ویژن اے جس نوں مل کے ودھان دیندے رہواں گے۔خط وچ امریکی صدردا کہنا سی کہ پاکستان دے نال مل کے انسانی حقوق دے تحفظ تے ترقی دے ودھا لئی پُر عزم ہاں، دوناں قوماں دے وچکار استوار مضبوط پارٹنرشپ نوں تقویت دیاں گے۔وزیراعظم شہباز شریف نوں خط وچ امریکی صدر جوبائیڈن نے آکھیا کہ دوناں ملکاں دی عوام دے وچکار استوار قریبی رشتے ہور مضبوط بناواں گے۔