آئین و قنون دی حکمرانی لئی تحریک چھیتی شروع کررہے ہاں:اسد قیصر

اسلام آباد (بیورورپورٹ)مرکزی رہنما تحریک انصاف اسد قیصر دا کہنا اے کہ آئین و قنون دی حکمرانی لئی تحریک بوہت چھیتی شروع کررہے ہاں۔رہنما تحریک انصاف اسد قیصر نے آکھیا اے کہ ہائی کورٹ دے ججاں اُتے جس طرح دبا پایا گیا تے اونہاں نوں ڈرایا دھمکایا گیا ایہ ہُن سپریم کورٹ دی ذمہ داری بن دی اے کہ ہائی کورٹ دے ججاںنوں مکمل تحفظ فراہم کرن، ہائی کورٹ دے معزز ججاں دی توہین وچ شہباز شریف دا مکمل ہتھ اے،اونہاں نے آکھیا کہ پچھلے 2ورھیاں وچ تحریک انصاف تے عدلیہ دے ججاں نوں شہباز شریف دے دور حکومت وچ ہراساں کیتا گیا، ججاں دے نال ایہ واقعات پورے پاکستان پیش آئے نیں لیکن ہائی کورٹ دے اینہاں6ججاں نے جیہڑی بہادری وکھائی اے ایہ قوم دے ہیرو نیں۔اسد قیصرنے آکھیا کہ میں پاکستانی شہری تے قومی اسمبلی دے ممبر دی حیثیت نال چیف جسٹس سپریم کورٹ توں مطالبہ کردا ہاں کہ ایس معاملے اُتے جوڈیشل کمیشن بنایا جائے، اینہاں ججاں نوں مکمل انصاف فراہم کیتا جائے، میرا وزیر اعلی خیبر پختونخواہ نوں مشورہ اے کہ وفاق دے نال رابطے ختم کر دین کیونکہ اونہاں نے تہاڈا کوئی مطالبہ نہیں مننا، اونہاں نے اجے تک اک افسر وی تہاڈے کہن اُتے نہیں لایا نہ صوبے دے بقایاجات اُتے کوئی پیشرفت ہوئی اے۔