بانی پی ٹی آئی عمران خان دے خلاف ٹیریان کیس ناقابل سماعت قرار

اسلام آباد(بیورورپورٹ)اسلام آباد ہائی کورٹ نے بانی پی ٹی آئی عمران خان دے خلاف ٹیریان وائٹ کیس ناقابل سماعت قرار دے دتا۔اسلام آباد ہائیکورٹ دے جسٹس طارق محمود جہانگیری دی سربراہی وچ 3 رکنی لارجر بنچ نے مبینہ بیٹی ٹیریان نوں کاغذات نامزدگی وچ ظاہر نہ کرن اُتے بانی پی ٹی آئی عمران خان دے خلاف نااہلی کیس دی سماعت کیتی، جسٹس ارباب محمد طاہر، جسٹس ثمن رفعت وی لارجر بنچ دا حصہ سن۔شہری محمد ساجد ولوں وکیل حامد علی شاہ عدالت سامنے پیش ہوئے، ایس موقع اُتے پی ٹی آئی رہنما شبلی فراز وی کمرہ عدالت وچ موجود سن۔دوران سماعت جسٹس طارق محمود نے آکھیا کہ ٹیریان کیس 2 ججاں دا فیصلہ اے،2 جج درخواست ناقابل سماعت قرار دے چکے نیں۔بعد وچ اسلام آباد ہائی کورٹ دے لارجر بنچ نے 2 ججاں دا سنایا جان والا فیصلہ درست قرار دیندیاں ہویاں عمران خان دے خلاف دائر درخواست نوں ناقابل سماعت قرار دے دتا۔خیال رہے کہ شہری محمد ساجد محمود نے مبینہ بیٹی نوں کاغذات نامزدگی وچ ظاہر نہ کرن اُتے تحریک انصاف دے بانی عمران خان نوں نااہل کرن دی استدعا کر رکھی سی۔