چینی تصورات نے انسانی تہذیب دی ترقی وچ اہم کردار ادا کیتا اے، آ صف علی زرداری

اسلام آباد (بیورورپورٹ) صدر آصف علی زرداری نے آکھیا اے کہ بین الاقوامی صورتحال چاہے جسطرح دی وی ہوئے یا اوس وچ کوئی وی تبدیلی ہوئے ، پاکستان تے چین دے تعلقات ہمیشہ مضبوط، پائیدار تے سدا بہار رہے نیں تے دوناں ملکاں نے ہمیشہ اک دُوجے دے بنیادی مفاد تے اہم خدشیاں بارے امور اُتے اک دُوجے دی بھرپور حمایت کیتی اے، مختلف خطریاں تے چیلنجاں نال نمٹن لئی مل کے کم کیتا اے تے ملکاں دے وچکار دوستانہ تبادلیاں دی مثال قائم کیتی اے۔منگل والے دن چائنا میڈیا گروپ نوں اک خصوصی انٹرویو وچ صدر زرداری نے آکھیا کہ سال 2024 وچ پاکستان دا صدر منتخب ہون دے بعد چینی میڈیانوں اونہاں دا ایہ پہلا انٹرویو اے۔ 21 مئی نوں چین تے پاکستان دے وچکار سفارتی تعلقات دے قیام دے 73 وی ں جنم دیہاڑ اُتے کیتے جان والے انٹرویو وچ آصف زرداری نے پچھلی نسل دے رہنماؤاں دے وچکار پاکستان تے چین دی گہری دوستی نوں یاد کیتا۔