ڈینیل پرل قتل کیس، ملزماں دی رہائی روکن دے حکم وچ وادھا رد

اسلام آباد: سپریم کورٹ نے ڈینیل پرل قتل کیس دے ملزماں دی رہائی روکن دے حکم امتناع وچ وادھے دی استدعا رد کر دتی۔ سپریم کورٹ وچ ڈینیل پرل قتل کیس وچ ملزمان دی بریت دے خلاف سندھ سرکار دی عرضی تے سماعت ہوئی۔ ملزمان دے وکیل محمود شیخ ایڈووکیٹ آکھیا اک عدالت نے ملزمان نوں بری کیتا، اک ملزم دی سزا 7سال کر دتی گئی، 7سال والا ملزم 18سال توں ودھ جیل کٹ چکیا اے، ملزمان نوں بریت دے فیصلے دے باوجود رہا نہیں کیتا جا رہیا۔ ہائی کورٹ نے آکھیا ملزمان نے زندگی دا بہترین ویلا جیل وچ گزار دتا۔

جسٹس قاضی امین نے ریمارکس دتے باہر کیہ ہو رہیا اے ایہدے نال غرض نہیں سانوں ریکارڈ ویکھ کے فیصلہ کرنا اے، جیل وچ رہن والے بے گناہ قرار پان تے مداوار ممکن نہیں، عدالت نے ملزما ن نوں بری کر دتا، بریت دا فیصلہ غیر معمولی اختیار نال کالعدم ہو سکدا اے، سندھ سرکار ملزمان نوں جیل وچ کیوں رکھنا چاہندی اے۔سپریم کورٹ نے ملزمان دی رہائی روکن دے حکم امتناع وچ وادھے لئی سندھ سرکار دی استدعا رد کر دتی۔ جسٹس مشیر عالم نے ریمارکس دتے سندھ سرکار پہلاں ای تن مہینے لئی ملزمان نوں حراست وچ رکھن دا حکم دے چکی، حکومتی احکامات دے بعد عدالتی حکم دے ہون نہ ہون نال فرق نہیں پیندا۔ کیس دی ہور سماعت 21اکتوبر نوں ہووے گی۔