بھارت دی اپنے 4جاسوساں دی رہائی لئی اسلام آباد ہائیکورٹ وچ عرضی

اسلام آباد: بھارتی ہائی کمیشن نے فوجی عدالت توں سزا پان والے چار مجرمان دی رہائی لئی اسلام آباد ہائی کورٹ وچ عرضی دائر کیتی اے۔ بھارتی ہائی کمیشن تے قیدیاں نے بیرسٹر ملک شاہ نواز نون دے راہیں عرضی دائر کیتی جہدے وچ استدعا کیتی گئی اے بھارتی قیدی برچو، بنگ کمار، ستیش بھگ تے سونو سنگھ نوں رہا کیتا جائے۔

عرضی وچ موقف پیش کیتا گیا لہور جیل وچ قید 3بھارتی مجرم تے کراچی جیل دے اک مجرم نوں پاکستان وچ جاسوسی تے دہشت گرد کاروائیاں تے سزا ہوئی، جیل وچ موجود بھارتی قیدی اپنی سزا پوری کر چکے، قنونی طور تے اجہی کوئی وجہ نہیں کہ وہ جیل وچ قید رہن، سزا پوری کرن دے بعد قیدیاں نوں جیل وچ رکھنا آئین پاکستان دے تحت دتے جان والے حقوق دی خلاف ورزی اے۔ قیدیاں نوں رہا کرکے واپس بھارت گھلن دی ہدایت کیتی جائے تے قیدیاں نوں اوہناں دے دیس بھارت وچ گھلن لئی انتظامات کرن دا حکم دتا جائے۔