وزیراعظم نے اپنی تقریر وچ تصدیق کیتی کہ نوازشریف توں استعفیٰ منگیا گیا: شاہد خاقان

اسلام آباد: سابق وزیراعظم شاہد خاقان عباسی دا کہنا اے وزیراعظم عمران خان نے کنونشن سنٹر وچ تقریر وچ تصدیق کیتی کہ نوازشریف توں استعفیٰ منگیا گیا۔ اسلام آباد وچ پریس کانفرنس دے دوران شاہد خاقان عباسی دا کہنا سی معیشت تباہ ہو چکی اے تے عوام تکلیف وچ نیں، وزراء اپوزیشن نوں دھمکیاں دے رہے نیں پر وزیراعظم نے اج تک عوام دی پریشانی دی گل نہیں کیتی، وزیراعظم نے اج تک نہیں دسیا کہ چینی 110تے آٹا 75روپے کلو کیوں اے تے بل دگنے کیوں ہو گئے۔

شاہد خاقان عباسی دا کہنا سی نظام مفلوج ہو چکیا اے تے ایس لئی اسیں باہر نکلے آں، کل ڈیمو کریٹک موومنٹ دا پہلا جلسہ ہو رہیا اے، انتظامیہ نے رکاوٹاں پاؤن دی کوشش کیتی پر نکام ہوئی، نہ کنٹینر کم آن گے تے نہ رکاوٹاں جد کہ میں تے اپوزیشن جیل توں نہیں گھبراندے، فتح جمہوریت دی ہووے گی۔ سابق وزیراعظم دا کہنا سی سپیکر تے چیئرمین دا رویہ متنازعہ اے، کل سینیٹ دا اجلاس وی بلالیا گیا اے، ایجنڈا کوئی نہیں اے، کہڑا اہم مسئلہ سی جہدے لئی اجلاس بلایا گیا، ایہ اوہ رویہ جہنے اج جمہوریت نوں مفلوج کر دتا اے پر ساڈی تحریک ایہدے خلاف اے کہ دیس وچ حقیقی جمہوریت قائم ہووے۔